Да пачатку XX ст. існаваў драўляны парафіяльны касцёл. Намаганнямі ксяндза Бернатовіча было распачата будаўніцтва новага храма ў стылі неаготыкі. Храм быў асвячоны 6 жніўня 1912 года ксянзом Красоўскім у гонар святога Антонія. Касцёл пабудаваны з чырвонай цэглы. Зараз знаходзіцца ў стадыі рэстаўрацыі.

У 1886 годзе у Рагачове адкрыўся праваслаўны сабор Аляксандра Неўскага, пабудаваны ў псеўдавізантыйскім стылі. Манументальны пяцікупальны храм меў цэнтрычную аб'ёмна-прасторавую кампазіцыю. У час Вялікай Айчыннай вайны храм быў знішчаны. У 1989 годзе быў пабудаваны новы храм, які таксама носіць імя Аляксандра Неўскага.

Пабудаваны ў канцы XIX—пачатку XX ст. з цэглы, рэканструяваны ў 1950 годзе. Двухпавярховы будынак накрыты вальмавым дахам. Галоўны фасад завершаны развітым карнізам з сухарыкамі. Фасад афарбаваны ў два колера. Дом — помнік эклектычнай архітэктуры. Пабудаваны на сродкі купца Беленькага.

Гэты дом у 1914 годзе збудаваў дзед пісьменніка Уладзіміра Караткевіча Васіль Грынкевіч. Маленькі Валодзя прыязджаў сюды на летнія вакацыі да любімай бабулі Людмілы Антонаўны Барысевіч (1873—1963), якая пахаваная на Старых могілках Рагачова (у снежні 2009 на яе магіле ўсталяваны помнік). У гэтым доме Караткевічу быў вылучаны асобны пакой, дзе былі створаныя «Ладдзя Роспачы», «Сівая легенда», «Віно дажджоў», часткова «Каласы пад сярпом тваім» і часткова «Хрыстос прызямліўся ў Гародні». Пісьменнік вельмі любіў прыязджаць сюды і праводзіў у Рагачове часам некалькі месяцаў за год.

Будынак пабудаваны ў 1914—16 гадах з цэглы. Цяпер тут раённы цэнтр пазашкольнай работы і раённая бібліятэка. Будынак асіметрычнай кампазіцыі. Галоўны фасад падзелены на чатыры розныя па памерах часткі. У дэкоры фасада выкарыстаны пілястры, лучковыя і паўцыркулярныя нішы, рустоўка.

Асабняк гараджаніна Спірыдонава пачатку XX ст. Зараз у гэтым будынку педагагічны коледж. У двары захаваліся часткі фантана.

Частка будынка былой настаўніцкай семінарыі, дзе вучыўся Міхась Лынькоў у 1913—1917 гг. Зараз крама "Октябрьская".

Пабудавана ў 1903—07 гг. з цэглы. У першыя дні вайны спалена. Адноўлена ў 1950-я гады. Цяпер тут сярэдняя школа №2. Двухпавярховы Г-падобны ў плане будынак накрыты вальмавым дахам. Галоўны фасад мае сіметрычную кампазіцыю з рызалітамі па баках. Помнік архітэктуры з выкарыстаннем элементаў неакласіцізму. Пабудаваны на сродкі мецэнатаў Іолшыных.

Обычный дом оформлен в необычном стиле.

На старых могілках ёсць тры капліцы. У плане гэтыя будынкі — квадраты са зрэзанымі вугламі, пакрытыя шатровым дахам.

Пабудавана ў 2-й палове XIX ст. Грэшнерам, ляснічым дзяржаўных угоддзяў. Капліца — помнік архітэктуры псеўдарускага стылю.

Пабудавана ў 1905 г. Іолшыным Васілём Васільевічам — прадвадзіцелем дваранства г. Рагачова, мецэнатам. Капліца — помнік архітэктуры псеўдарускага стылю.

Пабудавана ў 1912 годзе для жонкі павятовага воінскага начальніка Вяржейскага. Капліца — помнік архітэктуры класічнага стыля.