Гэты дом у 1914 годзе збудаваў дзед пісьменніка Уладзіміра Караткевіча Васіль Грынкевіч. Маленькі Валодзя прыязджаў сюды на летнія вакацыі да любімай бабулі Людмілы Антонаўны Барысевіч (1873—1963), якая пахаваная на Старых могілках Рагачова (у снежні 2009 на яе магіле ўсталяваны помнік). У гэтым доме Караткевічу быў вылучаны асобны пакой, дзе былі створаныя «Ладдзя Роспачы», «Сівая легенда», «Віно дажджоў», часткова «Каласы пад сярпом тваім» і часткова «Хрыстос прызямліўся ў Гародні». Пісьменнік вельмі любіў прыязджаць сюды і праводзіў у Рагачове часам некалькі месяцаў за год.